മൺസൂൺ ബമ്പർ ₹10 കോടി സമ്മാന ടിക്കറ്റ് കണ്ണൂരിൽ വിറ്റത്; ഭാഗ്യവാനെ കണ്ടെത്താനായില്ല

കണ്ണൂർ : ഇന്നലെ നടന്ന കേരള സംസ്ഥാന ഭാഗ്യക്കുറി വകുപ്പിന്റെ മൺസൂൺ ബമ്പർ BR-110 നറുക്കെടുപ്പിൽ ₹10 കോടിയുടെ ഒന്നാം സമ്മാനം കണ്ണൂരിൽ വിറ്റ ടിക്കറ്റിനാണെന്ന് സ്ഥിരീകരിച്ചു. എന്നാൽ സമ്മാനാർഹമായ ടിക്കറ്റ് വാങ്ങിയ ഭാഗ്യവാനെ ഇതുവരെ കണ്ടെത്താനായിട്ടില്ല.

കണ്ണൂർ പഴയ ബസ് സ്റ്റാൻഡ് കോംപ്ലക്സിലെ ശ്രീ കാവേരി ഏജൻസിയിൽ നിന്നാണ് ഒന്നാം സമ്മാനാർഹമായ ടിക്കറ്റ് വിറ്റത്. ഏജൻസി ഉടമ മുണ്ടയാട് സ്വദേശി ടി. മനോജാണ്. തോട്ടടയിൽ കഴിഞ്ഞ മൂന്ന് വർഷമായി ലോട്ടറി ചില്ലറ വിൽപന നടത്തുന്ന കൊൽക്കത്ത സ്വദേശിയായ പോപ്പി ഖാൻ വഴിയാണ് ടിക്കറ്റ് വിറ്റഴിച്ചത്.

തോട്ടട ബസ് സ്റ്റോപ്പിന് സമീപത്തെ ഹോട്ടലിലെ ജോലി നഷ്ടപ്പെട്ടതിനെ തുടർന്നാണ് പോപ്പി ഖാൻ ലോട്ടറി വിൽപന രംഗത്തേക്ക് എത്തിയത്. ജൂൺ 28-നാണ് അദ്ദേഹം ശ്രീ കാവേരി ഏജൻസിയിൽ നിന്ന് മൺസൂൺ ബമ്പർ ടിക്കറ്റുകൾ വാങ്ങി വിൽപന ആരംഭിച്ചത്.

ഈ സീസണിൽ ശ്രീ കാവേരി ഏജൻസിയിലൂടെ ഏകദേശം 96,000 മൺസൂൺ ബമ്പർ ടിക്കറ്റുകൾ വിറ്റഴിച്ചതായി ഏജൻസി ഉടമ അറിയിച്ചു. എറണാകുളം ലോട്ടറി ഓഫീസിൽ നിന്ന് ലഭിച്ച ടിക്കറ്റിലാണ് ഒന്നാം സമ്മാനം ലഭിച്ചത്. കണ്ണൂരിന് പുറമെ കോഴിക്കോട്, തൃശൂർ, എറണാകുളം ജില്ലകളിൽ നിന്നുള്ള ടിക്കറ്റുകളും ഈ ഏജൻസി വഴി വിറ്റഴിച്ചിരുന്നു.

ഭാഗ്യവാനെ കണ്ടെത്തുന്നതിനായി ലോട്ടറി ഏജൻസിയും അധികൃതരും കാത്തിരിക്കുകയാണ്.